Vika 30/2010
Þrítugasta vinnuvika ársins hófst í dag um svipað leyti og samræmdar vefmælitölur þeirrar 29. birtust hér. Flestir vefir bæta við sig milli vikna, en þó enginn jafnhressilega og grapevine.is, sem stekkur úr 43. sæti listans upp í það 16. með ríflegri þreföldun notendafjölda milli vikna.
Eins og menn vita hefur um nokkurt skeið staðið til hjá Modernus að bjóða upp á auglýsingateljara með samræmdu sniði líkt og þekkt er orðið með almennu vefmælinguna. Einar Bjarni Halldórsson, forritari, og Flemming Kaj Larsen, hönnuður, hafa í sumar unnið ötulum höndum að gerð auglýsingateljarans og má vænta ávaxtar vinnu þeirra með haustinu. Nýi auglýsingateljarinn mun gera auglýsendum kleift að sjá nákvæmlega hversu margir smella á tiltekna auglýsingu, hve oft er smellt og hve oft auglýsingin birtist. Þá verður hægt að tilgreina ákveðið "target" eða "mark" auglýsingarinnar og skoða árangurinn sem hlutfall af þeim sem sáu auglýsing og lentu á marksíðunni. Síðar meir verður mögulegt að fylgja eftir þeim notendum sem lenda inni á síðu auglýsandans í gegnum ákveðna auglýsingu og meta þannig með nákvæmum hætti árangur hverrar auglýsingar fyrir sig. Það eru spennandi tímar framundan!
Vika 29/2010
Hvað veðurfar snertir var síðasta vika með hinu allra besta móti. Sólin lék á alls oddi og sprengdi klæðin utan af ungum sem öldnum, sem spókuðu sig afdráttarlítið á strætum, torgum og iðagrænum völlum borgarinnar. Golfvellir voru þétt setnir kylfingum í sólskinsskapi og vart sást í vatnið í sundlaugunum fyrir fagurbrúnum kroppunum sem fylltu þær bakkanna á milli.
Áhrif blíðviðrisins leyna sér heldur ekki þegar rýnt er í nýbirtar tölur 28. viku á lista Samræmdrar vefmælingar. Tíu stærstu vefirnir sýna allir sem einn hlutfallslega lækkun á milli vikna og aðeins 2 af efstu 20 bæta við sig. Þetta eru blogcentral.is og vf.is, en hjá þeim síðarnefnda munar mestu um 40% aukningu hjá kylfingur.is, sem er eins og stendur enn mældur sem vefhluti vf.is. Góðviðrið og opna breska meistaramótið í golfi hafa líklega mikið þar um að segja. Annar íþrótta- og útivistarvefur, hlaup.is, tók jafnframt stökk milli vikna og bætir notendafjölda sinn um heil 45%!
Gaman verður að fylgjast með framvindu mála í þessari viku, en sólin lætur engan bilbug á sér sjá og heldur áfram að senda sína björtustu geisla inn um gluggann á skrifstofu þess, er þetta ritar. Líklega skellir sá hinn sami sér í sund - nú eða jafnvel golf - eftir vinnu! :)
Vika 26/2010
Í stillingum vefmælingarinnar er að finna liðinn "Morgunskýrslur Modernus". Þar undir má bæta við viðtakendum fyrir daglegar, vikulegar og mánaðarlegar skýrslur. Hver og einn notandi getur síðan ákveðið innihald sinna skýrslna með því að velja liðinn "Innihald skýrslna" undir "mínum stillingum". Morgunskýrslur Modernus eru sendar út í þúsundatali. Þær innihalda nú fleiri liði en áður, t.d. skiptingu notenda milli borga og bæja innanlands svo eitthvað sé nefnt.
Til þess að geta bætt við notanda þarf hann að vera til í kerfinu fyrir. Nýjum notenum er bætt við undir liðnum "Notendalisti" og þar eru notendur einnig fjarlægðir.
Síðustu vikur hafa tæknimenn Modernus unnið hörðum höndum að gerð nýs og öflugs auglýsingateljara, sem mun koma sér sérstaklega vel fyrir þá vefi sem selja auglýsingar. Þessi nýi auglýsingateljari Modernus, sem lengi hefur verið beðið eftir, fer í prufukeyrslu hjá femin.is þann 12. júlí ef allt gengur eftir.
Modernus
Vika 24/2010
Modernus tók nýlega í notkun geysiöflugan sérbyggðan rannsóknar-gagnagrunn frá Vertica fyrir Samræmda vefmælingu. Grunnurinn er, eins og nafnið gefur til kynna, lóðrétt hannaður (e. vertical), sem þýðir að leita má jafnharðan lóðrétt og lárétt að upplýsingum í honum. Gagnagrunnur Modernus er yfir 4 milljarðar lína að dýpt um þessar mundir og stækkar stöðugt. Þetta er of mikill línufjöldi fyrir hefbundna gagnagrunna að vinna með, sérstaklega þar sem svara þarf fyrirspurnum frá notendum á sem skemmstum tíma.
Ný gögn á 10 mínútna fresti. Vertica-grunnurinn skilar nýjum gögnum út til notenda á 10 mínútna fresti allan sólarhringinn, en Modernus átti orðið erfitt með að standa undir gagnaskilum á 60 mínútna fresti með gamla MySQL-grunninum. Hann hafði þó verið notaður frá árinu 2001, lengst af með ágætum árangri. Til þess að sjá nýjustu upplýsingar, og lista yfir 10 nýjustu notendur vefjarins svo dæmi sé tekið, þarf að skrá sig inn á https://login.modernus.is.
Lýðfræðilegar og fjárhagslegar upplýsingar tvinnaðar saman við vefmæligögn. Vefmæling Modernus verður á næstu mánuðum þróuð þannig að samtvinna má upplýsingar úr öðrum kerfum við vefmæligögnin. Þá verður hægt að svara spurningum eins og: "Hversu margir Akureyringar smelltu á borðann minn á bestavefnum.is fyrir hádegi á fimmtudag og bókuðu miða á tónleikana sem þar voru auglýstir, og hvernig var kyn- og aldursdreifing þeirra?" Þegar þessi þjónusta verður tilbúin geta vefirnir í samstarfi við auglýsendur notað upplýsingarnar til að ákvarða umboðslaun til vefjanna, en slíkt fyrirkomulag er þegar orðið að veruleika úti í hinum stóra heimi. Einar Bjarni Halldórsson yfir-yfirforritari Modernus, þróar nýju lausnina í samvinnu við Flemming Kaj Larsen hjá fix.is :).
Vika 20/2010
Framfarir. Vefmæling Modernus tekur nú hröðum framförum eftir að nýi Vertica gagnagrunnurinn var tekinn í gagnið í upphafi mánaðarins. Í dag var sett inn ný og mun nákvæmari greining á landfræðilegri staðsetningu notenda vefjanna. Með henni má sjá frá hvaða borgum og bæjum lesendur koma, hvaðanæfa að á jörðinni, en ekki aðeins á Íslandi eins og hingað til. Nú kætast frændur vorir Færeyingar, en þeir höfðu sérstaklega beðið um þetta.
Nýjar tölur á 10 mínútna fresti. Gagnagrunnur Modernus spýtir út nýjum tölum á tíu mínútna fresti allan sólarhringinn. Þess má geta að Google teljarinn (fría útgáfan af Urchin teljaranum) uppfærir sig á minnst 6 klukkustunda fresti.
Toppsíður. Liðurinn sýnir nú fjölda lesenda per síðu og hvernig þeir dreifast yfir daginn, eða tímabilið sem er valið. Smellið fyrst á liðinn Toppsíður og síðan á stækkunarglerið við síðunafnið. Þá kemur upp tafla sem sýnir hversu margir sóttu síðuna og hvenær. Hjá mjög stórum vefjum, með þúsundir vefskjala í mælingu, getur tekið allt að 30 sekúndur að sækja gögnin.
Kyn og aldur. Mikilvæg viðbót, sem verið er að vinna að, er kerfi sem gerir kyn- og aldursdreifingu notenda vefjanna sýnilega. Meira um það í júní/júlí.
Úrræði við reglubrotum. Modernus hefur nú fengið heimild frá Samráðshópi um Samræmda vefmælingu til þess að taka út tölur vefsvæða, sem augljóslega uppfylla ekki reglur Samræmdrar vefmælingar. Þetta á t.d. við um vefhluta sem ekki uppfylla reglur um samhæft útlit og leiðarkerfi við aðalvef. Auðvitað þarf Modernus fyrst að gefa viðkomandi vef tækifæri á að betrumbæta sig, og vefurinn getur í öllum tilvikum kært niðurstöðu Modernus til Samráðshópsins, sem fellir svo endanlegan úrskurð.
Eftir að nýja kerfið var tekið í notkun er Modernus mögulegt að taka tölur tilgreindra vefhluta eða vefskjala út úr heildartölum viðkomandi vefjar og birta "hreinsaðar" og samanburðarhæfar tölur á lista Samræmdrar vefmælingar. Þetta er mikið framfaraskref, sem eykur enn trúverðugleika Samræmdrar vefmælingar. Til stendur að útbúa fleiri tegundir af útgáfulistum, en fyrst nú er það eiginlega mögulegt án mikils tilkostnaðar. Hugmyndin er að birta lista yfir mest lesnu fréttirnar og vinsælustu "bloggara" landsins.
Modernus.