Modernus - deild í Interneti á Íslandi hf.
Modernus ehf var stofnað í janúar 2000. Félagið keypti 93% hlut í Interneti á Íslandi hf. í mars 2007 og var eins og lög gera ráð fyrir slitið eftir sameiningu við það félag 1. janúar 2008. Modernus er nú deild í Interneti á Íslandi. Hlutafé félagsins er 20.000.000 að nafnvirði. Hluti starfsemi Modernus, Samræmd vefmæling®, er starfrækt í samráði við samráðshóp um Samræmda vefmælingu, sem stærstu vefir landsins eiga fulltrúa í. Samræmd vefmæling þjónar einnig Færeyjum í samstarfi við Gallup Föroyar. Aðrar deildir Internets á Íslandi hf. eru ISNIC sem sér um reksturinn á rótarnafnaþjóninum fyrir Ísland og frumskráningu á .IS lénum, og RIX (Reykjavik Internet Exchange) sem er sameiginlegur tengipunktur internetþjónustuaðila á Íslandi og hefur það meginhlutverk að koma í veg fyrir að innlend netumferð flæði um utanlandasambönd með tilheyrandi kostnaði og lengingu á svartíma innlendrar netnotkunar.
Sameiginleg velta félaganna 2007 var um 170 mkr og hagnaður e. skatta um 40 mkr. 10 manns starfa hjá félaginu. Stjórnarformaður Internets á Íslandi hf. er Tryggvi Karl Eiríksson viðskiptafræðingur, sérfr. hjá Hagstofu Íslands. Meðstjórnendur eru Jens Pétur Jensen hagfr. sem jafnframt er framkvæmdastjóri félagsins, Bárður Hreinn Tryggvason fjárfestir, Magnús Soffaníasson framkvæmdastjóri TSC ehf og meðstofnandi að Modernus, og Ingimundur Sigurpálsson forstjóri Íslandspósts hf, sem fer með um 20% hlutafjár. Um 30 fyrirtæki, opinberar stofnanir og einstaklingar eru hluthafar í Interneti á Íslandi hf. Félagið er stofnað 1995 upp úr rekstri SURÍS (Samtök um upplýsinganet rannsóknaraðila á Íslandi) sem er sá aðili sem kom Internetinu á fót á Íslandi 1986.